Facebook ka pësuar ndërprerjen më të rëndë në histori, ku shumica e opsioneve nuk ishin funksionale për gjithë përdoruesit globalë gjatë ditës së mërkurë. Hera e fundit kur Facebook ka pësuar një ndërprerje të ngjashme, ka qenë viti 2008 kur kishte 150 milionë përdorues, ndryshe nga 2,3 miliardë që ka sot. Gjithashtu nga ky problem u prek edhe platforma tjetër, Instagram. BBC shkruan se shumë kompani që punojnë me Facebook, ishin nën panik për orë të tëra.
Shkaku i këtij problemi nuk është bërë ende publik. “Jemi në dijeni se njerëzit kanë probleme me Facebook dhe aplikacionet e tjera të grupit tonë. Po punojmë për ta zgjidhur sa më shpejt”, thanë zyrtarët e Facebook në një deklaratë. Ende mëngjesin e së enjtes (me orën shqiptare) nuk ka një deklaratë të dytë ku të konfirmohet se problemi është zgjidhur plotësisht.
Në përgjigje të thashethemeve të postuara në rrjetet e tjera sociale, kompania tha se ndërprerja nuk ishte rezultat i një sulmi të njohur si Distributed Denial of Service, një lloj sulmi kibernetik që prek rrjetet me trafik shumë të madh online.
Interesant është fakti se gjatë kohës që Facebook dhe Instagram ishin jashtë funksioni, shumë përdorues i kthyen sytë nga Twitter, ku edhe ironizuan dy platformat më të mëdha sociale. Hashtagu #FacebookDown dhe #InstagramDown është përdorur më shumë se 150 mijë herë në pak orë./Opinion.al
