Pas lajmeve se një biznesmene ka denoncuar Shullazin dhe grupin e tij se i kanë marrë pronën përmes kanosjes, ka reaguar avokati i të arrestuarve.
Ai e ka cilësuar si të pavërtetë lajmin dhe si një inskenim të organit të akuzës, i cili kërkon sipas tij të mbajë me çdo kusht prapa hekurave tre klientët e tij.
“Marrja e një kallëzimi nga një shtetase që kurrë s’ka pasur ndonjë marrëdhënie për ndonjë pronë te ish-kafe “Flora” me Gilmando Danin dhe Emiljano Shullazin, dhe në asnjë proces gjyqësor për ndonjë pronë të pretenduar nga ata është një artificë e sforcuar e organit të akuzës”, deklaron avokati Alban Qafa, transmeton panorama.
“Nuk ka asnjë pronë të blerë nga Gilando Dani te zona e ish-kafe “Florës” apo te “Zogu i Zi. Nuk ka asnjë shtetas që t’i ketë shitur Gilmando Danit ndonjë vilë për 1 milion euro te ish-kafe “Flora”.
Gjithçka bëhet për të justifikuar arrestimin e tyre pa prova duke i dhënë lajme të pavërteta opinionit publik për shkak se më datë 5 bëhet gjykimi i masës së arrestit në Apel”, vijon Qafa.
Ai thotë se në këtë mënyrë, Prokuroria kërkon që të ndikojë në vendimin e gjykatës me lajme hipotetike për prona që sipas tij, as Emiljano Shullazi dhe as Gilmando Dani nuk i kanë.
