Prokuroria e Tiranës ka kërkuar dënim me 15 vite burg për biznesmenin Adrian Xhillari i akuzuar për skandalin e naftës virxhin. Procesi gjyqësor në ngarkim të Xhillarit po zhvillohet në mungese pasi prej zbulimit te skemës ai ishte larguar nga Shqipëria.
Në datën 6 nëntor të 2017 ai u ndalua në Zvicër dhe po kryhen procedurat për ekstradimin. Biznesmeni akuzohet për fshehje të ardhurash, mospagim taksash dhe pastrim parash. Hetuesit kërkuan edhe heqjen e të drejtës për të drejtuar kompani per një periudhe 10-vjeçare. Ndërsa per kompaninë ‘Tea Oil’ u kërkua vendosja e një gjobe prej 5 milionë lekësh.
Në skemën e naftës virxhin ishin të përfshirë dhe punonjës të doganës. Për ish-numrin dy të doganave, Lula Njebza u kërkua dënimi me 5 vite burgim. Ndërsa për Mirearbër Teneqexhiun 3 vite heqje lirie. Këta ish-zyrtarë të doganës akuzohen për shpërdorim detyre. 4.4 milion litra naftë bruto janë shitur në Tiranë dhe Durrës duke i shkaktuar buxhetit të shtetit një dëm prej 2 milionë Eurosh. Dëmi i shkaktuar mjedisit dhe automjeteve të qytetarëve është i pallogaritshëm.
