Kina dhe Shtetet e Bashkuara ranë dakord që të zhvillojnë bisedime për tregtinë, në fillim të tetorit në Uashington.
Ministria e Tregtisë e Kinës tha se për bisedimet u ra dakord në një bisedë telefonike midis zëvendëskryeministrit të Kinës, Liu He, përfaqësuesit amerikan të tregtisë, Robert Lighthizer, dhe sekretarit amerikan të Thesarit, Steven Mnuchin.
Lajmi bëhet i ditur në kohën e frikës se përshkallëzimi i luftës tregtare midis dy vendeve mund të shkaktojë recesion ekonomik global.
Kujtojmë se prej vitit të kaluar, SHBA-ja ka vendosur tarifa shtesë mbi mallrat e importuara kineze, ndërsa Presidenti i Shteteve të Bashkuara, Donald Trump, ka paralajmëruar se do të jetë edhe më i ashpër ndaj Pekinit nëse bisedimet tregtare zvarriten.
Nga ana tjetër Kina u përgjigj me sanksione të ngjashme kundër SHBA-së, gjë që ka lëkundur tregjet e aksioneve dhe ka rritur frikën për një recesion global./Opinion.al
