Gjatë përditësimit të situatës Covid-19, ministria e Shëndetësisë njofton se në spitalin Infektiv dhe “Shefqet Ndroqi”, përveç pacientëve të konfirmuar pozitivë me Covid19, po vijojnë të marrin trajtim edhe pacientë të dyshuar.
Shefja e Departamentit të Sëmundjeve Infektive në ISHP, Silva Bino, tha në një prononcim për TV Klan se në 20% të rasteve tamponi nuk identifikon rastet e infektuara dhe ato konfirmohen më pas nga ekazminimi radiografik.
“Janë dy spitale që janë pothuajse të mbushura. Jo vetëm shtretërit, por edhe kapacitetet e shërbimit të kujdesit intensiv. Kemi raste të mundshme. Në 20% të rasteve në tampon nuk identifikohet dhe mund të kemi të bëjmë me Covid, gjë e cila pasqyrohet në shenja klinike dhed radiologjike”, tha Bino.
Bino shtoi gjithashtu se masa të tjera, përveç atyre aktuale, do të kishin vlerë në reduktimin e përhapjes së virusit.
“Përveç distancimit fizik individual, përdorimit të maskave, natyrisht do të kishin vlerë edhe masa të tjera, por kjo do të vlerësohet hap pas hapi”, shtoi ajo.
Gjatë 24 orëve të fundit Shqipëria regjistroi një tjetër rekord rastesh të reja, 141 të prekur. Aktualisht grupmoshat më të prekura janë 50-64-vjeçarët të ndjekur nga 24-34-vjeçaret. /Opinion.al
