Teksa KQZ i dha dritën jeshile për të kandiduar për Bashkinë e Lezhës, me partinë Bindja Demokratike, Salvador Kaçaj ka njoftuar se është tërhequr nga gara.
Në një letër drejtuar KQZ, ai thekson se propozimin për të përfaqësuar Bindjen Demokratike në 30 Qershor e vlerësoi si një mundësi për të marrë pjesë në një garë për të mirën e Lezhës, por disa rrethana dhe informacione gjatë këtyre ditëve, e kanë nxitur që të rishikojë vendimin.
“Unë nuk mund të shërbej si fasadë e përpjekjes për të rikthyer në Shqipëri një regjim një partiak, të përzier me krimin. Është bindja ime më e thellë se zgjedhjet farsë, pa opozitën e vërtetë në 30 Qershor do të ishin shkatërrimtare për qytetarët e Lezhës dhe të të gjithë Shqipërisë”, shkruan ai.
Kaçaj ishte kandidatura e tretë për qytetin e Lezhës pas zyrtarizmit të Pjerin Ndreut nga PS dhe Eduard Ndocajt si i pavarur. Ky është kandidati i dytë nga partia e Patozit, që tërhiqet nga gara. Pak ditë më parë tërheqjen e njoftoi dhe kandidati për bashkinë e Skraparit, Dejvis Hebibasi./ Opinion.al
