Prodhuesi i prezervativëve Durex ka thënë se shitjet kanë rënë pasi bllokimi nga koronavirusi është “duke ulur kontaktet intime” në Mbretërinë e Bashkuar dhe në të gjithë botën.
Shefi ekzekutiv i ndërmarrjes, Laxman Narasimhan, tha se shitjet e prezervativëve kishin rënë pasi njerëzit nuk janë në gjendje të kryejnë marrëdhënie seksuale për shkak të rregullave të rrepta të distancimit fizik dhe bllokimit.
Narasimhan thotë se në Itali njerëzit kryejnë shumë më pak marrëdhënie seksuale, dhe kjo është vënë re edhe në Britaninë e Madhe pasi rregullat e imponuara nga pandemia kanë ndaluar edhe njohjet e reja.
Ai tha se ankthi i shtuar gjithashtu kishte çuar në më pak marrëdhënie midis çifteve
Narasimhan shtoi se në Kinë, rënia e marrëdhënieve gjatë izolimit ishte rikuperuar dhe kërkesa për prezervativ ishte përsëri në të njëjtat nivele si para krizës.
Kombet e Bashkuara kanë paralajmëruar se mungesa e prezervativëve mund të çojë në probleme shkatërruese shëndetësore dhe sociale në të gjithë botën. “Një mungesë e prezervativëve, ose ndonjë kontraceptivi, mund të çojë në një rritje të shtatzënive të padëshiruara, me pasoja potenciale shkatërruese shëndetësore dhe sociale për vajzat, gratë dhe partnerët dhe familjet e tyre të reja,” tha një zëdhënës.
Rënia e marrëdhënieve seksuale nga ana tjetër sjell një tjetër problem për shoqërinë. Studimet tregojnë një lidhje mes nivelit të tyre dhe nivelit të stresit dhe dhunës. Pra sa më i ulët të jetë niveli i marrëdhënieve aq më i lartë është stresi dhe rastet e dhunës. /Opinion.al
