Beteja për datën e zgjedhjeve lokale të 30 qershorit, tani zbret në terren. Pasi dolën në deklaratë zyrtare se njohin dekretin e Presidentit Meta, kryebashkiakët që janë nga opozita tashmë kërkojnë dhe lirimin e ambienteve ku janë vendosur KZAZ-të.
Këtë të hënë, Kryetarja e Bashkisë së Shkodrës, Voltana Ademi i ka dërguar një kërkesë zyrtare Policisë së këtij Qarku, ku i kërkon mbështetjen për lirimin e ambienteve të Komisioneve Zonale të Administrimit të Zgjedhjeve.
Në letrën e saj, Ademi thekson se Policia duhet të jetë prezentë dhe të mbështesë bashkinë e Shkodrës në lirimin e këtyre ambienteve, pas dekretit të Presidentit për anulimin e datës së zgjedhjeve.
Ademi i referohet ligjit për qeverisjen vendore dhe për këtë arsye kërkon që Policia të ndihmojë në lirimin e KZAZ-ve nr.2, nr. 4 dhe nr.5.
Në të gjitha qytetet KZAZ-të janë marrë në mbrojtje dhe ruhen nga oficer të policisë së shtetit. Janë 27 bashki të drejtuara nga tre parti të opozitës që i kërkuan Komisionit Qëndror të Zgjedhjeve lirimin e ambienteve të KZAZ-ve dhe heqjen e listave të zgjedhësve.
Kjo si detyrim pas dekretit të Presidentit për të shfuqizuar 30 Qershorin si datën e zgjedhjeve lokale. Por KQZ e cilëson si nul dekretin e presidentit dhe ka kërkuar vijimin e punës për procesin zgjedhor./ Opinion.al
