Kosova nën ethet e zgjedhjeve parlamentare, të parakohshme të 6 tetorit. Këtë të mërkurë, emisioni Opinion është marrë pikërisht me zhvillimet në Kosovë. Gazetarja e Tv Klan në Prishtinë, Blerta Dalloshi Berisha tha se janë tre parti ato që dominojnë fushatën për këto zgjedhje.
“Janë tre parti politike më të favorizuar: LDK, LVV dhe PDK. Të tre këto parti po garojnë të vetme në zgjedhje, nuk kanë parti të vogla në koalicion. Tema kryesore është dialogu, po kandidatët shpërndajnë akuza dhe kundër akuza, por nuk ka argumente kryesore për dialogun”, tha gazetarja e Tv Klan në Prishtinë.
I gjithë faktori ndërkombëtar po pret me “ankth” rezultatin e këtyre zgjedhjeve, ndërsa pas të hënës do të mësohet se si do të shkojë dhe fati i dialogut Kosovë-Serbi.
Më shumë se 35 mijë qytetarë të Kosovës që jetojnë në vende të ndryshme të botës, janë regjistruar si votues nga diaspora për zgjedhjet parlamentare që do të mbahen më 6 tetor. Votimi nga diaspora ka filluar më 19 shtator dhe përmbyllet më 5 tetor./ Opinion.al
