Kryeministrja e Serbisë, Ana Bërnabiç ka akuzuar kryeministrin e Kosovës, Albin Kurti për tensionet në veri, duke e cilësuar atë si një njeri të papërgjegjshëm që sjell konflikt të armatosur, ndërsa theksoi se komuniteti ndërkombëtar po hesht për lëvizjet e Kurtit.
“Jam jashtëzakonisht e shqetësuar, ishte e vështirë të flija mbrëmë. Albin Kurti na solli të gjithëve, serbëve dhe shqiptarëve, në prag të luftës, por nuk e bëri i vetëm”, theksoi ajo.
Bërnabiç nënvizoi se serbët nuk janë të mbrojtur në Kosovë, as në jug e as në veri të Ibrit, dhe shtoi se Serbia është afër të kërkojë kthimin e forcave të saj, sipas rezolutës 1244 të Këshillit të Sigurimit të OKB-së.
“Besoj se sot presidenti Aleksandër Vuçiç do të japë më shumë informacion për këtë, për takime të shumta dhe se Serbia ka të drejtë të kërkojë kthimin e forcave të saj në territorin e Kosovës sipas Rezolutës 1244, sepse KFOR-i nuk po e bën atë”, u shpreh ndër të tjera kryeministrja serbe.
