Ish kryeministri Sali Berisha ka theksuar nga foltorja e Kuvendit se ajo që ndodhi në aeroportin shqiptar është një akt i mirëfilltë terrorizmi, jo ndaj personave, por një grabitje e stilit terrorist.
Berishta thotë se për 12 minuta banda e armatosur me të gjitha mjetet, jo për 3 minuta, por për 12, pushtoi pistën e avionëve. Kreu krimin e shëmtuar dhe u largua, pa iu futur ferra në këmbë.
“Çfarë mësuan shqiptarët nga ju? Se ju nuk keni asnjë përgjegjësi për aeroportin. Nëse ka një pikë më nevralgjike siguria kombëtare, ky është aeroporti, pastaj janë portet dhe më pas territoret e tjera. Ju thatë se skemi përgjegjësi ne, por përgjegjësi ka kompania e avokatit të kreut të tuaj. Siguria e aeroportit të Rinasit varej nga avokati i Edvin Kristaq Ramës. Ai ndihej zot në protektoratin e tij të krimit”, tha ai.
Ish kryeministri Berisha bëri me dije se nga banka janë nisur 30 milion euro, ose 115 kg euro.
Më tej, theksoi se nën 20 milion euro avionët nuk transportojnë.
“Se edhe avionët kanë problemet e tyre të shkarkimit. Janë rrëmbyer mirë e bukur, qetë e qetë 85 kg, janë rrëmbyer të paktën 20 milion euro. Kjo është vepër e një bande zyrtare qeveritare, jo e një bande ordinere”, tha Berisha.
