Në një takim të zhvilluar në Shijak, në kuadër të fushatës elektorale për zgjedhjet vendore të 14 Majit, ish-kryeministri, Sali Berisha, teksa prezantoi kandidatin e koalicionin “Bashkë Fitojmë”, Rezeart Tusha për zgjedhjet e 14 Majit komentoi edhe deklaratat e Kryeministrit Edi Rama.
Berisha tha se Rama shkon nga takimi në takim në këtë fushatë “me zorrën qorre në gojë”.
“Ju jeni njerëz banorët e Shijakut, por edhe shqiptarët tani kanë parimet e lirisë, parimet e demokracisë. Kjo që ndodh, kjo dramë kombëtare që kalojmë, ky genocid i vërtetë që ushtrohet ndaj shqiptarëve duke krijuar kushte për largimin e tyre nga vendi, ka si emërues të përbashkët, ka si shkak të gjitha shkaqeve pushtetin në duart e një njeriu i cili njëherë u thotë se do bëhem Sekretari i Përgjithshëm i NATO-s, kaq i vyer jam. Një herë tjetër u thotë se jemi bërë shembull botëror, herën e tretë qarkon nga takimi në takim me zorrën qorre në gojë dhe në mos me zorra të tjera. Pra një njeri që mendon dhe beson se me pushtetet e tij mund të bëjë ç’të dojë, mund të thotë ç’të dojë, mund të bëjë natën, mund të bëjë ditën dhe të marrë çdo vendim për qytetarët shqiptarë. Ndaj këto zgjedhje më 14 Maj janë jetike jo vetëm për vendosjen e një njeriu të ndershëm, një njeriu të përkushtuar, një menaxheri të shkëlqyer që do përdorë çdo qindarkë tuajën me transparencën më të madhe, por janë jetike për të rikthyer pluralizmin në Shqipëri”, u shpreh Berisha.
Më herët kryeministri Rama u shpreh se më 14 maj duhet t’i japin goditjen zorrës qorre, referuar Sali Berishës dhe Ilir Metës.
