IshKryeministri Sali Berisha, ka shigjetuar kreun e qeverisë Edi Rama, në ditën e dëshmorëve. Pas homazheve të bëra paraditen e sotme, tek memoriali i ri Azem Hajdarit me rastin e 5 Majit, ai tha se Rama ruan lidhje me kriminelë.
Berisha deklaroi se Edi Rama ka filluar flirtin me vrasësit që dergjen në burgje duke nënvizuar se, “Kjo tregon se ti ke frikë dhe tmerr nga Azem Hajdari dhe e vërteta është që ke një mijë arsye pasi Azemi është burim i pashtershëm frymëzimi për të të rezervuar ty neobllokmen, fatin që ai u rezervoi etërve të tu barbarë dhe mizor”. Ai tha gjithashtu se sot nderohet njeriu që pas gjysëm shekulli shtypje të egër, solli tek shqiptarët ditën e gjenezës.
“Nderojmë Azem Hajdarin që në dhjetor 1990 do të ngrihej si antenë për t’i bërë shqiptarët të lirë. Azemi dhe Besim Çera ranë si dy vëllezër këtu para selisë së PD, të ekzekutuar nga pushteti që Azemi përmbysi me revolucionin e tij demokratik”, tha Berisha. Ai shtoi se vepra e Azem Hajdarit bëhet gjithnjë e më madhështore dhe se bëri mundur të gjitha ngjarjet e tjera të mëdha që shqiptarët përjetuan 25 vitet e fundit.
