Sali Berisha teksa prezanton programin elektoral të PD-së, premtoi se më 11 Maj gratë dhe vajzat shqiptare do të kenë një prioritet të veçantë dhe ato do të jenë ato që do t’i presin biletën qeverisë së kryeministrit Edi Rama.
“Po a ka të keqe më të madhe se atë që i largon nënës vajzën apo djalin në rrugë të botës? Po a ka të keqe më të madhe për një grua, për një zonjë, për një motër se sa t’u largosh burrin nga shtëpia për të siguruar kafshatën? A ka të keqe më të madhe se ti mizogjinë tënde ke nxitur në mënyrë mizore dhunën kundër grave dhe dëgjojeni e ka me borxh të përrallisë për çdo gjë, po se flet një fjalë kur një grua dhunohet, se flet një fjalë kur një grua barbarisht vritet. Kurrë ndonjëherë s’keni për ta dëgjuar. Sepse në thellësinë e tij ai ka një arkaizëm, ai është një mizogen i pakorrigjueshëm dhe ju garontoj se gratë dhe vajzat shqiptare do të jenë ato të cilat më 11Maj do i presin biletën, Dhe u garantoj se gratë dhe vajzat shqiptare do jenë ato të cilat me 11 maj do i presin biletën, do e nisin aty ku e meriton.
Miqtë e mi, programi ynë i Shqipërisë Madhështore, po të kishte një emër të dytë, do ishte programi i rinisë shqiptare. Në 12 vite, 600 mijë të rinj kanë ikur nga Shqipëria. Në 12 vite, Shqipëria po humbet ëndrrën e vet. Vilson Blloshmi, një poet i pavdekshëm, Shqipërinë në diktaturë e krahason me Saharanë, dhe thotë Saharaja ëndrra nuk ka, Saharaja nuk ëndërron. E vërteta është se në narkodiktaturë, ëndrra po i ikën Shqipërisë. Ëndrrat po i ikin çdo ditë. Ndaj dhe ne do bëjmë gjithçka që të rinjtë shqiptarë të qëndrojnë në Shqipëri. Do bëjmë gjithçka për shkollimin e tyre, për punësimin e tyre, çatinë e tyre, për biznesin e tyre. Do bëjmë gjithçka që jo vetëm këta që janë këtu, por dhe ata që kanë ikur, të rikthehen në dheun e tyre dhe të ndërtojnë ëndrrën në Shqipëri. Të kthehen dhe t’i japin Shqipërisë të ardhmen që meriton. Ndaj dhe programi ynë ka në themel mbështetjen e fuqishme për rininë shqiptare”, tha Berisha.
