Prokuroria për Krimet e Rënda zgjati me 3 muaj afatet e hetimeve për dosjen e 613 kilogramëve kokainë të kapur shkurtin e 2018 në Maminas. Në këtë operacion ranë në pranga shoferi i kamionit, Armando Pezaku dhe menaxheri i firmës “Arbi Garden”, Donaldo Lushaj. Ndërsa 4 muaj më pas, u arrestua në Gjermani, pronari i kompanisë, Arbër Çekajn. Për këtë të fundit, Krimet e Rënda kanë dërguar një letër- porosi në Gjermani, për t’i marrë deklarimin. Ndërkohë, për ekstradimin e tij në Tiranë ende nuk ka një përgjigje pasi Arbër Çekaj ka bashkëpunuar me autoritetet gjermane.
Por në të njëjtën ditë me zgjatjen e hetimeve vjen dhe një denoncim nga ish-kryeministri Sali Berisha. Sipas këtij të fundit, që publikon një mesazh në Facebook, thuhet se kjo sasi e madhe kokaine është dërguar në Itali dhe është shitur.
Sipas procedurave ligjore, sasia e drogës asgjësohet në momentin kur Gjykata jep vendim të formës së prerë. Gjithmonë duke iu referuar procedurës standarde, sasia e drogës e kapur peshohet dhe më pas vuloset dhe dërgohet në magazinat e shtetit.
Droga me vlerë tregu rreth 180 milionë euro e nisur nga Kolumbia dhe mbërritur në portin e Durrësit, ishte e fshehur në një kontenier që ishte mbushur me banane. Kontenieri u mbajt disa ditë nën vëzhgim deri kur ngarkesa u mor në dorëzim nga “ArbiGarden”. Droga ishte fshehur ne 528 pako të mbështjella me letër natriban me kode të vendosura nga trafikantët./ Opinion.al
