Kompania e cila do të marrë me koncesion shërbimin laboratorik publik në 18 spitale të vendit, do të ketë në dorëzim edhe trupën e profesionistëve. Këtë fakt e konfirmoi dje në Kuvend ministri i Shëndetësisë, Ilir Beqaj.
I thirrur në një seancë dëgjimore për t’u ballafaquar me shqetësimet e ngritura nga grupet e interesit, por edhe për të hedhur dritë mbi këtë nismë, për të cilën pikëpyetjet që shtrohen janë të shumta, ministri pranoi se duke nisur prej 1 janarit, shërbimi laboratorik në 18 spitale të vendit do të jepet me koncesion dhe se operatorit, krahas pajisjeve, do t’i besohen edhe burimet njerëzore.
“Ne i kemi kërkuar IFC-së që të studiojë mundësinë për të administruar përmes partneritetit publik-privat shërbimet laboratorike të 5 spitaleve universitare të Tiranës, të 11 spitaleve rajonale, si edhe të spitalit të Lushnjës dhe atij të Sarandës.
Në këto 18 spitale janë rreth 420 veta që janë të punësuar për të ofruar këtë shërbim, nga të cilët 80 veta janë mjekë dhe kimistë. Këta të fundit do të vazhdojnë të jenë të punësuar pranë spitaleve publike, ndërsa personi tjetër do të jetë i punësuar pranë atij operatori që mund të dalë fitues nga tenderi”, tha Beqaj.
Nisma e Ministrisë së Shëndetësisë për të dhënë me koncesion shërbimin laboratorik publik nuk është mirëpritur, jo vetëm nga grupet e interesit dhe opozita, por është parë me rezerva edhe brenda vetë maxhorancës.
Deputeti i PS-së, Ylli Ziçishti, tha se mungojnë informacionet mbi efektet pozitive dhe negative që pritet të sjellë ky privatizim. Mosbërja publike e studimit të fizibilitetit, të cilësuar si një dokument konfidencial nga ministri Beqaj, solli reagimin e kryetares së Komisionit të Shëndetësisë, Albana Vokshi, dhe deputetit të LSI-së, Petrit Vasili.
Sipas Vasilit, mbajtja fshehur e studimit lë vend për dyshime. Për deputetin e LSI-së, ky model koncesionimi që kërkohet të aplikohet nuk ekziston në asnjë prej vendeve të BE-së.
“Shërbimi i laboratorëve nuk është as shërbim ristruacioni, as larjesh çarçafësh, është pjesë e shërbimit integral mjekësor. Ju mund të kundërshtoni sa të doni, por një shërbim i tillë i mbuluar tërësisht nga një PPP, është një model që nuk ekziston, të paktën në vendet e BE-së”, tha Vasili.
Shoqata e Teknikëve të Mjekësisë Laboratorike u shprehën të painformuar mbi nismën. Ata kërkuan që nga ky proces të mos preken burimet njerëzore.
Vetëm për vitin 2017, ky koncesion do t’u kushtojë taksapaguesve 8 milionë dollarë.
