Kandidati i Partisë Socialiste për Bashkinë e Shkodrës, Benet Beci ka folur për projektet e tij për kryeqendrën e veriut.
Gjatë një interviste për “Klan Neës”, Beci ka vlerësuar dhe një nga projektet e qeverisë “Berisha”. Sipas tij, projekti më i mirë dhe më i suksesshëm ka qenë ai i rrugëve rurale.
Kandidati i PS-së për Shkodrën, Beci shton se nuk ka qenë asnjëherë më parë i përfshirë në politikë derisa është zgjedhur deputet i Partisë Socialiste, mandat të cilin e la për të kandiduar për Shkodrën.
“Unë nuk kam qenë asnjëherë në politikë, as në kohën kur kam bashkëpunuar me ish-kryeministrin Berisha e derisa të shkoja në Parlament. Kam qenë drejtor i Fondit Shqiptar të Zhvillimit apo i KESH-it, jo anëtar partie dhe nuk jam as sot. Nuk kam qenë kurrë. Arsyeja pse është menduar me një lloj asocimi politik ka qenë se gjatë qeverisë së ish-kryeministrit Berisha, projekti më i mirë dhe ndoshta më i suksesshmi i asaj qeverie ka qenë projekti i rrugëve rurale, i bërë me donatorët që unë kam qenë drejtori i fondit. Ishte produkti më i mirë që Qeveria Berisha prodhoi nga programi. Po kështu edhe gjatë qeverisjes së qeverisë Rama, Fondi Shqiptar i Zhvillimit me donatorët arriti të bëjë disa nga projektet zhvillimore të jashtëzakonshme në qytete”,-tha Beci./Opinion.al
