“Greqia po pret një iniciativë nga qeveria shqiptare e kryeministrit Edi Rama për të adresuar ngërçin e vazhdueshëm në marrëdhëniet dypalëshe të shkaktuar nga ndalimi i Fredi Belerit, kryebashkiakut të zgjedhur etnik grek në qytetin jugor të Himarës, me akuzën e pretendimit për blerje votash”. Kështu shkruan gazeta greke “Ekathimerini”, në një artikull kushtuar marrdhënieve dypalëshe Shqipëri-Greqi.
Greqia ka vendosur tre kushte për të mos vënë veton ndaj aspiratave të anëtarësimit të Shqipërisë në BE: betimin e Belerit, një gjykim të drejtë për të dhe respektimin e prezumimit të pafajësisë.
Zyrtarët në Athinë janë me sa duket në konsultim me Belerin, duke kërkuar një rrugë të mesme për një çështje që shtrihet përtej marrëdhënieve greko-shqiptare dhe duket se ka ndikuar gjithashtu në debatin më të gjerë mbi perspektivën evropiane të Ballkanit Perëndimor. Megjithatë, duke gjykuar nga manovrat e fundit të Ramës, shumë analistë dhe ekspertë besojnë se kryeministri shqiptar po përpiqet t’i hapë rrugën përsëritjes së zgjedhjeve në Himare, ndërsa Beleri është i burgosur dhe i paaftë për shkak të çështjeve ligjore të pazgjidhura.
Këto zhvillime të fundit u paraprinë nga një sfond shumë intensiv diplomatik dhe shkëmbime mes Athinës dhe Tiranës në nivele të ndryshme.
Javët e fundit me Endri Fugën, bashkëpunëtorin e ngushtë të Ramës, kontakte u bënë edhe nga Ministria e Jashtme. Madje, të enjten, ministri i Shqipërisë për Evropën dhe Punët e Jashtme, Igli Hasani tha se “ka negociata, ide dhe angazhime nga të dyja palët për të gjetur një zgjidhje”.
Hasani theksoi se “vendimi i Gjykatës Speciale është duke u shqyrtuar nga qeveria dhe po shqyrtohen të gjitha hapat që do të çojnë në një situatë që do të krijojë një zgjidhje afatgjatë dhe të besueshme”.
