Presidenti i Republikës së Shqipërisë, Bajram Begaj, ka marrë pjesë ditën e sotme në panairin ndërkombëtar të bujqësisë në Lushnje.
Gjatë fjalës së tij, ai e konsideroi këtë panair tregues të partneritetit të prodhuesve shqiptarë me ata të huaj, si dhe arritje të konkurrueshmërisë së produkteve tona në tregjet ndërkombëtare.
Begaj theksoi se produktet Made in Albania duhet të jenë krenari kombëtare.
”Produktet bujqësore Made in Albania duhet të jenë edhe krenari kombëtare. I kemi të gjitha mundësitë. Tashmë, duhet vendosmëri për të vijuar punën e nisur dhe dashuri për këtë tokë”, u shpreh Kreu i Shtetit.
Duke theksuar rëndësinë e bujqësisë për ekonominë shqiptare, mirëqenien dhe punësimin, Presidenti i Republikës theksoi se krahas strategjisë afatgjatë, duhet të aplikohen skema dinamike që ofrojnë zgjidhje përballë sfidave të kohës, ku më emergjente është lëvizja demografike dhe emigracioni.
”Largimi nga fshati nuk vjen nga joshja e dritave të qytetit, brenda apo jashtë vendit, por nga pamundësia për një mënyrë jetese që sjell jo vetëm arritje personale, por kontribuon edhe në mirëqenien e shoqërisë”, u shpreh Presidenti Begaj.
