Policia ka arrestuar në flagrancë dy persona në fshatin Buzaishtë, pranë Pogradecit.
Sipas policisë dyshohet se këta persona kanë ndihmuar të arratiset shtetasi S.Ç., i cili ditën e djeshme u konfliktua me punonjësit e ndihmës sociale.
Uniformat blu bëjnë me dije se në pranga kanë rënë shtetasit A. H., 40 vjeç dhe B. H., 38 vjeç.
Kujtojmë se ditën e djeshme 39-vjeçari pasi u konfliktua me shtetasin V. I., në kërcënimin e një arme zjarri pistoletë, ka tentuar t’i marrë atij, dy celularë dhe një orë dore.
“Specialistët për Hetimin e Krimeve në Komisariatin e Policisë Pogradec arrestuan në flagrancë shtetasit A. H., 40 vjeç dhe B. H., 38 vjeç, banues në fshatin Buzaishtë.
Nga veprimet hetimore të kryera për ngjarjen e ndodhur mesditën e djeshme, në fshatin Buzaishtë, dyshohet se këta dy shtetas, në bashkëpunim me njëri-tjetrin, kanë larguar me automjet nga vendi i ngjarjes, autorin e dyshuar, shtetasin S. Ç., 39 vjeç, banues në Pogradec.
39 vjeçari pasi u konfliktua me shtetasin V. I., 54 vjeç, banues në Tiranë, në kërcënimin e një arme zjarri pistoletë, ka tentuar t’i marrë atij, dy celularë dhe një orë dore.
Vijon puna për kapjen e shtetasit S. Ç. dhe për dokumentimin e plotë të rrethanave të ngjarjes”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë.
