Bashkimi Evropian u ka kërkuar të gjitha palëve që të ulin tensionet në Lindjen e Mesme.
Presidentja e Komisionit Evropian, Ursula von der Leyen tha të mërkurën se përdorimi i armëve “duhet të ndalet tani” në mënyrë që tensionet të mos degradojnë dhe “t’i jepet hapësirë dialogut” për situatën në Iran dhe Irak.
Duke folur gjatë një konference të përbashkët shtypi me Shefin e Çështjeve të Jashtme të BE Josep Borrell, ajo tha:
“Kriza e tanishme prek jo vetëm rajonin, por të gjithë ne. Përdorimi i armëve duhet të ndalet tani për t’i dhënë hapësirë dialogut.”
Borrell i përshkroi zhvillimet e fundit në Iran, Irak dhe rajon në tërësi si “jashtëzakonisht shqetësuese” dhe paralajmëroi që një përshkallëzim i dhunës mund të rrezikojë punën e “Koalicionit Anti-Daesh”, një emër tjetër për ISIS.
“Sulmet e fundit me raketa në bazat ajrore në Irak të përdorura nga forcat amerikane dhe të koalicionit, mes tyre forcat evropiane, janë edhe një shembull tjetër i përshkallëzimit dhe konfrontimit të shtuar.
Situata aktuale vë në rrezik përpjekjet e viteve të kaluara dhe gjithashtu ka implikime për punën e rëndësishme të Koalicionit Anti-Daesh. “, shtoi ai.
Borrell përsëriti gjithashtu angazhimin e BE për të ruajtur marrëveshjen bërthamore të Iranit, duke konfirmuar se ai ka ftuar Ministrin e Jashtëm iranian Mohammad Javad Zarif në Bruksel për bisedime mbi situatën në vazhdim.
Ndërkohë, NATO po monitoron situatën në Irak dhe ka qenë në kontakt me autoritetet amerikane, tha një zyrtar i aleances për CNN të mërkurën. /Opinion.al
