Listës së “parajsave fiskale” të krijuar nga BE-ja në dhjetor të vitit 2017, qeveritë e vendeve anëtare i kanë shtuar ditën e djeshme dhe disa vende të tjera, ndër to dhe Emiratet e Bashkuara Arabe.
Ministrat e financave të BE-së shtuan në listë vende si Aruba, Barbados, Belize, Bermuda, Dominika, Fixhi, Ishujt Marshall, Oman e Vanuatu.
Kriteret që ndiqen për të përcaktuar nëse një vend u përket parajsave fiskale janë, transparenca fiskale, taksimi i ekuilibruar dhe respektimi i normave të Organizatës OECD për trasferimin e fitimeve nga një vend në tjetrin. Shtetet e listuara në “listat e zeza” përballen me dëmtime reputacioni dhe kontrolle më të rrepta për transaksionet me BE-në.
Ministrat e mbledhur në Bruksel kanë lënë jashtë kësaj liste edhe vende që dyshohet se janë përfshirë fuqishëm në aktivitete të tilla, si Panamaja, Bahamasi, Zvicra, Ishujt Virxhin, Ishujt Kajman,, Luksemburgu, Malta, Qipro e të tjera. /Opinion.al
