Në konferencën për mediat të mbajtur ditën e sotme Presidenti Meta është pyetur nga gazetarët nëse do të ketë një bashkëpunim me ish-kryeministrin Berisha për të mundur dyshen Rama-Basha. Meta u shpreh se pas 25 prillit misionin si President e quan të përfunduar ndërsa theksoi se do kishte dashur që në 26 prill të kishte marrë një drejtim tjetër.
Pyetje: Keni paralajmëruar do i riktheheni politikës sa të mbarojë mandati i Presidentit, a do keni ju bashkëpunim me Sali Berishën për të mundur “dyshen Basha-Rama”?
Përgjigja e Presidentit Ilir Meta: Që pas 25 prillit unë misionin tim e quaj të përfunduar si President por detyrën e bej çdo ditë deri në sekondën e fundit 24 korrik me përgjegjësi maksimale se respektoj institucionin e kreut të shtetit.
Do kisha dashur që në 26 prill të kisha marrë një drejtim tjetër, sepse njeriu duhet të jetë në vendin e duhur në kohën e duhur por më duhet të tregoj respekt për shtetin e institucionet.
Unë bëra çdo gjë që mos kapej reforma në drejtësi siç është kapur.
Tani tabloja është shumë e qartë do vijoj të bëj gjithçka si president pas 24 korrikut në çdo detyrë tjetër që do e gjykoj unë të arsyeshme pas konsultimit me popullin e 2 marsit të paktën, se kam shumë detyrime për popullin e 2 marsit.
