Kryetari i PD-së, Lulzim Basha, ka preferuar sot të japë një urim për besimtarët myslimanë shqiptarë së bashku me një mesazh shprese duke cituar disa vargje të Kuranit.
Basha theksoi në urimin e tij se Muaji i Ramazanit ka qenë një sakrificë e madhe për të gjithë agjeruesit, me ditë të gjata e të nxehta.
“Uroj që Zoti t’ua pranojë sakrificën dhe agjerimin si një ndjesë dhe si një bekim për të gjithë shqiptarët dhe kombin shqiptar”, ka thënë Basha.
Ai ka nënvizuar se këto janë ditë të vështira për mijëra familje, janë ditë të pasigurisë dhe të varfërisë.
Urimi i plotë i kreut të PD-së, Lulzim Basha:
Gëzuar Fitër Bajramin çdo shqiptari. E di se Muaji i Ramazanit ka qenë një sakrificë e madhe për të gjithë agjeruesit, me ditë të gjata e të nxehta. Uroj që Zoti t’ua pranojë sakrificën dhe agjerimin si një ndjesë dhe si një bekim për të gjithë shqiptarët dhe kombin shqiptar. Këto janë ditë të vështira për mijëra familje. Janë ditë të pasigurisë, të varfërisë. Por festa e sotme është edhe një simbol shprese dhe besimi. Prej ditës së parë të Ramazanit më kanë mbetur në mend katër vargje të Kuranit të cilat me lejen tuaj do desha t’i kujtoj sot publikisht, një sure të Kuranit që quhet Ndriçimi.
“Në mesditë kur shndrit dielli
e natën kur erresira bie
Zoti yt nuk të ka braktisur
as zemëruar me ty nuk është.
E patjetër çfarë po vjen
më e mirë është se çfarë po shkon
e Zoti bujar do të jetë me ty
e ti i kënaqur”.
Zoti e bekoftë Shqipërinë dhe shqiptarët!
Gëzuar Bajramin!
