Kreu i PD-së, Lulzim Basha, të hënën, deklaroi se është tronditëse të shohësh një të mbijetuar të përdhunimit dhe të dhunës t’i mohojë ato për të mbetur gjallë.
Përmes një shënimi në rrjetin social Facebook, Basha shkruan se Xhisiela Maloku e di shumë mirë se çfarë kriminelësh gjakftohtë dhe të pamëshirshëm janë ata.
Ai thekson se Rrahman Rrahja është pjesë e një prej bandave kriminale që sundojnë dhe terrorizojnë Shqipërinë.
Sipas tij, në Shqipëri nuk ka as polici, as prokurori, as drejtësi dhe as parlament.
“Parlamenti dhe drejtësia kanë rënë, dhe në vend të tyre sundon banda e Ramës, Rrahjave, Habilajve, Bajrëve, Shullazëve me shokë”,-citohet nga komenti i Bashës në Facebook.
Xhisiela Maloku, vajza që denoncoi për dhunë djalin e deputetit të Fushë-Krujës, Rrahman Rraja, u rrëfye sonte në emisionin ‘Opinion’ përballë gazetarit, Blendi Fevziu.
Maloku deklaroi se denoncimin e ka kryer nga xhelozia dhe inati, duke dëshmuar në mënyrë të rremë.
Ajo tregoi se dëshmia e saj që është publikuar në media, ku thuhet që është qëlluar me pjesën e pasme të pistoletës, që është qëlluar me grushta, që i është fikur cigarja në pjesën e kofshëve, nuk është e vërtetë.
