Kreu i Partisë Demokratike, Lulzim Basha ka publikuar disa pamje nga fshatrat e Fierit, ku situata duket kaotike. Këto foto vijnë si kundërpërgjigje ndaj kryeministrit Rama, teksa në mëngjes shfaqte pamje “spektakolare” nga Semani. Sipas Bashës, përpjekja e qeverisë, për ta nxjerrë në media këtë fatkeqësi si sukses qeveritar, apo braktisja e qytetarëve nga qeveria, është e vetmja gjë spektakolare.
Në fund Basha i kërkon kryeministrit Rama dëmshpërblim të qytetarëve, pasi dimri është i gjatë dhe i papërballueshëm.
Statusi i plotë:
Nuk ka asgjë spektakolare në Darzezë, në Ferras e në shumë fshatra të tjera të Fierit ku balta ka mbuluar dhjetëra shtëpi e ka shkaktuar dëme të rënda materiale. Dhe në Dërmenas po ashtu.
Asgjë spektakolare nuk ka në Novoselë e në zona të tjera të Vlorës ku, si pasojë e përmbytjeve, ka mungesa bazike, nga ushqimet tek dritat dhe uji.
Asgjë spektakolare nuk ka në Fushë-Krujë, në Bilaj, në fshatin Hasan dhe lagje të tjera, ku uji dhe balta kanë përmbytur e marrë me vete shumë pasuri dhe kursime të qytetarëve.
Po, ka dy gjëra spektakolare!
Spektakolare është përpjekja për ta nxjerrë këtë fatkeqësi në media e në ekrane si sukses qeveritar!
Spektakolare është braktisja e qytetarëve nga qeveria dhe lënia nën mëshirë të fatit pas asnjë ndihmë!
Edi Rama duhet ta lërë propagandën e t’u zgjidhë hallet mijëra familjeve, që janë prej tre ditësh pa ujë, pa ushqime e drita!
Edi Rama duhet t’i dëmshpërblejë për humbjet e pallogaritshme që kanë pësuar, pasi dimri është i gjatë dhe i papërballueshëm në këto kushte.
Çfarë shkruante Rama
Mëngjesin e sotëm kryeministri Edi Rama ka postuar një fotografi nga lumi Seman, duke e cilësuar si pamje spektakolare. Ndër të tjera Rama shkruan :
“MIRËMËNGJES 
?
dhe me këtë pamje spektakolare nga lumi Seman, i tërhequr tanimë në shtratin e tij, ju uroj një fillim jave të mbarë.
Faza e emergjencës kaloi, duke shënuar dëme shumë herë më të vogla se disa vjet më parë; gatishmëria dhe angazhimi maksimal vijojnë për rimëkëmbjen e çdo zone dhe çdo familje të prekur prej motit të tërbuar të tre ditëve të shkuara
?”
