Kryetari i Partisë Demokratike Lulzim Basha është shprehur ditën e sotme para të rinjve se ai dhe PD kanë nisur një betejë për ndryshimin e situatës për rininë, e cila, sipas tij, sot është në një gjendje të keqe.
Krydemokrati tha se qeveria “Rama” ka braktisur rininë , duke theksuar se me ardhjen e tij në pushtet kjo situatë do ndryshojë. Sipas liderit të opozitës, qeveria dështimin më të madh e ka me rininë, pasi po rritet në një vend me rroga minimale dhe kosto maksimale, në një vend me klimë të shkatërruar për bizneset.
“Ne kemi nisur një betejë, të cilën do ta fitojmë, për rininë dhe për çdo shqiptar. Sot foli Tilman Kuban, një politikan që është anëtar i kristian-demokratëve gjermanë. Qeveria nuk ka lënë askënd më shumë në baltë se rininë. Kjo qeveri dështimin më të madh e ka me rininë, e cila po rritet në një vend pa perspektivë, me rroga minimale dhe kosto maksimale, në një vend me klimë të shkatërruar për bizneset. Ky ka mbetur një vend, ku rinia mendon si të ikë, por kjo nuk duhet të ndodhë. Nuk duhet të ndodhë, sepse ky vend e ka potencialin për një të ardhme më të mirë. Kjo qeveri ka vendosur interesa të ngushta personale, duke tradhtuar interesin e qytetarëve shqiptarë. Ne kemi treguar se kemi këtë vizion e pasion për gjithë vendin e sidomos për rininë. Ne do të bëjmë realitet çdo zotim dhe zotimi ynë kryesor është të kthejmë shpresën, sidomos të rinisë. Ne do të krijojmë një klimë të mirë për biznesin. Shqipërinë me rininë që rri këtu ne do ta bëjmë realitet, vendin ku gjithë-secili të ndihet në shtëpinë e tij”, tha Basha./ Opinion.al
