Kryetari i Partisë Demokratike, Lulzim Basha thotë se pa zbatuar ligjin e dekriminalzimit në vend nuk mund të ketë zgjedhje normale, siguri e mirëqenie për qytetarët.
Nga dega 9 në kryeqytet, ku zhvilloi turin e bashkëbisedimit me strukturat e partisë, Basha tha se një ndër arsyet e pesëfishimit të kanabisit në vend është pikërisht kriminalizimi i pushtetit dhe emërimet në poste kyçe të personave me rekorde kriminale.
Kreu i PD, Lulzim Basha: Po të vesh Artur Bushin kryetar të bashkisë së Krujës, çfarë tjetër mund të presësh përveçse mbulimin e Bashkisë së Krujës nga droga dhe ndërtimin e aerodromeve të drogës në Bashkinë e Krujës? Po të kesh Artur Bardhin në Kurbin, Elvis Roshin në Kavajë, Armando Prengen në Laç, Arben Ndokën në Lezhë e kështu me radhë nga jugu në veri, çfarë tjetër mund të presësh? Kur kriminalizon shtetin, kur vendos trafikantët e dënuar në poste kyçe, kur këta të diktojnë përmes bashkëpunëtorit të tyre më të ngushtë, ministrit të brendshëm se kë do vesh shef policie, kë do vesh drejtor policie? Kriminalizimi i shtetit nga Edi Rama dhe Saimir Tahiri i parapriu kthimit të Shqipërisë në një hambar droge. Kjo do të thotë se pa zbatuar reformën më të rëndësishme në vend ligjin e dekriminalizimit, ne nuk mund të ecim përpara, nuk mund të ketë as zgjedhje, as procese të tjera normale. Siguria mirëqenia janë në rrezik.
Basha tha se pas aleancës me krimin, drogën dhe mafien e plehrave fshihet përpjekja e kryeministrit Edi Rama për të blerë votat në zgjedhjet parlamentare.
Në tre vjet qeverisje, tha kreu i demokratëve, Rama nuk i ka shërbyer interesit të qytetarëve duke asfiksuar klimën e biznesit dhe varfëruar shqiptarët./ TV KLAN
