60 persona nga Durrësi janë strehuar në hotelet e llixhave në Elbasan.
Kreu i Partisë Demokratike, Lulzim Basha ka vizituar sot disa nga qytetarët e prekur nga tërmeti.
Nëpërmjet një postimi në Facebook ai ka bërë të ditur se ka vizituar personat e strehuar në hotelet e llixhave në Elbasan dhe ka shprehur mirënjohjen për bujarinë e hotelierëve.
“Hotelet në Llixhat e Elbasanit kanë hapur dyert për familjet e goditura nga tërmeti dhe janë gati të akomodojnë qindra njerëz në nevojë. 60 të parët kanë ardhur prej dy ditësh, kryesisht nga Durrësi.
Jam i prekur dhe thellësisht mirënjohës për zemërgjerësinë bujare dhe dhembshurinë njerëzore të hotelierëve dhe personelit të hoteleve. Kjo është Shqipëria e vërtetë e njerëzve me zemër të madhe!”, shkruan Basha. /Opinion.al
