Kryetari i Partisë Demokratike, Lulzim Basha ndodhet në qytetin e Kavajës. Së bashku me kryebashkiakun, Isa Sakja, ai ka inspektuar nga afër banesat dhe pallatet, të cilat kanë pësuar dëmtime si pasojë e tërmetit 6.4 ballë të 26 nëntorit.
Banorët i bënë me dije Bashës së prej ditësh janë të detyruar të flenë nëpër makinë, teksa shtuan faktin se janë në pritje të ekspertëve për të përcaktuar nëse banesat e tyre përmbushin kushtet për banim apo jo.
“Kanë katër ditë që nuk vjen njeri ti shohë banesat, kurse sot 5 minuta para se të vinit ju, erdhën dhe i vendosen shiritat pallateve. Kemi katër ditë që flemë nëpër makina. Nuk po na japin një përgjigje që këtu do jetohet apo jo!”, tha një qytetar.
Ndërkaq, lideri demokrat porositi banorët të jenë të kujdesshëm dhe të mos futen në banesa e pallate, që kanë pësuar çarje në strukturë pasi jeta qëndron mbi gjithçka.
“E rëndësishme është mos me të futeni brenda pa e vërtetuar, futesh apo nuk futesh dot.. Jeta është e para. Unë do e ngre si problem. Unë sapo erdha nga Elbasani, miqtë tanë andej kanë hapur 600 vende për ju në qoftë se keni nevojë. E kuptoj që keni fëmijët në shkollë, por ndoshta deri të dielën mund t’i dërgoni. Ajo që ndodhi në Thumanë po të kishin vendosur dhe ta kishin bërë siç duhet, aty s’duhet të ishin futur njerëz brenda që vjet, sepse prej atëherë ishte dëmtuar. Jeta mbi të gjitha, mos të rrezikoni fare”, tha Basha/Opinion.al
