Kreu i Partisë Demokratike, Lulzim Basha është takuar me disa banorë të prekur nga tërmeti i 26 Nëntorit të cilët vijojnë të jetojnë në kushte të vështira.
Në Gjuricaj, Njësia Administrative Ishëm, kryetari i opozitës u ndal edhe në banesën e rrënuar, të familjes së Limon Filit.
Edhe pse ka kaluar 1 vit kjo familje jeton në një minimagazinë.. Ata pretendojnë se nuk i rindërtohet shtëpia pasi kanë qenë në mitingun e PD-së. Ndonëse banesa është jashtë funksioni, institucionet e kanë vlerësuar si DS2 dhe i kanë thënë se përfiton vetëm 250 mijë lekë të reja, ndërsa prej ndihmave ata nuk kanë përfituar fare.
Kryefamiljari kërkon vetëm një vlersim të drejtë për banesën, pasi po vjen dimri i dytë dhe duhet të jetojë në një minimagazinë në kushte të mjera.
Në Lalëz, Basha vizitoi familjen e Agim Muharremit që po jeton ende në çadër. Sipas tij, autoritetet thonë se rruga deri tek banesa nuk është e mirë prandaj nuk ka nisur rindërtimi.
E njëjta histori përsëritet edhe në shtëpinë e Kasem Gjetës në Shkafanë. Kasemi, por edhe banorë të tjerë të kësaj zone i thanë Bashes, dëmshpërblim po marrin njerëz që s’kanë pësuar asnjë dëmtim, ndërsa ata që kanë shtëpitë e shembura, jo.
Po në Shkafane, në familjen e Shpëtin Kurti, pjesëtarët e familjes po hyjnë në dimrin e dytë në çadër dhe në një kontenier që ia kanë dhuruar privatisht, pasi shtëpia e shembur plotësisht as ka nisur të hedhë themele.
E zonja e shtëpisë tha se ende s’kanë asnjë zgjidhje dhe po jetojnë në kushte të vështira.
Basha është zotuar para banorëve se pas ardhjes në pushtet të PD-së të gjitha paratë që duhet të shkonin për ta do t’i rikthen dhe investimet e tyre do të vihen në punë.
“Sot për sot duhet që zëri juaj të dëgjohet dhe të thuhet pa e zbukuruar. Sot erdha t’ju shoh dhe të zotohem që paret që janë për ju do të vijnë tek ju, shtëpitë do të rindërtohen dhe ato investime që janë bërë me paret tuaja do t’i vëmë në punë. U ngrit gjithë bota për ta ndihmuar Shqipërinë, vetëm këta s’u kujtuan. Por ju garantoj që do të marrë fund. Dy prioritete kryesore do të kemi.
E para, shëndetin edhe ekonominë që ka shkatërruar pandemia dhe gjithë ndihmat që i ka ndarë Europa për tërmetin dhe që duhet të vijnë tek ju, do të vijnë tek ju dhe buxheti i shtetit do të bëjë të mundur që brenda një kohe shumë të shkurtër shtëpitë t’ju rindërtohen dhe vuajtja që keni hequr t’ju lehtësohet sadopak. Më vjen keq që ju kam ardhur në këto kushte të vështira, por ju jap fjalën që do vij t’ju shoh edhe kur ta kemi riparuar këtë dëm edhe t’i keni shtëpitë e rindërtuara”, tha Basha./Opinion.al
