Kryedemokrati Lulzim Basha ka kujtuar ditën e sotme ish-presidentin e Kosovës Ibrahim Rugova në 15-vjetorin e vdekjes së tij.
Nëpërmjet një postimi në llogarinë e tij në “Facebook”, Basha e ka cilësuar yll polar ish-presidentin Rugova për të ardhmen e Kosovës. Basha shkruan ndër të tjera se Rugova mbetet një shembull i europianizmit dhe i Europës moderne.
“Ibrahim Rugova, shqiptari që udhëhoqi lëvizjen më të madhe paqësore në Europën moderne vijon të mbetet një shembull i europianizmit dhe i Europës moderne.
Projekti i tij i qartë për Kosovën e lirë dhe të pavarur në miqësi me Shtetet e Bashkuara dhe anëtare e Bashkimi Europian duhet të vijojë të mbetet yll polar për politikën e sotme dhe të ardhmen e Kosovës. Si një shenjë maturimi dhe përmbushje asaj për të cilën lideri historik i Kosovës punoi dhe u përpoq çdo ditë”, shkruan Basha në “Facebook”./Opinion.al
