Kryetari i Partisë Demokratike, Lulzim Basha mendon se tryeza e reformës zgjedhore nuk mund të arrijë një konsensus për ndryshimin e sistemit zgjedhor megjithëse ai thotë se është në favor të një ndryshimi.
Në një intervistë për ABC News, Basha tha se mbështet ndryshimin e sistemit zgjedhor dhe është në favor të një sistemi mazhoritar me dy dhoma.
“Ka një keqkuptim që tryeza mund të arrrijë konsensus për sistemin unë kam qenë për ndryshim sistemi e kam thënë që jam për mazhoritar me dy dhoma. Të diskutosh me një hajdut zgjedhjesh siç e ka kapur OSBE, gazeta Bild nga padia e së cilës u tërhoq. Ky është një njeri i cili nuk e ka problemin te sistemi por te vjedhja e zgjedhjeve. Ne do të garantojmë votën dhe një garant është qeveria tranzitore 100 ditë para zgjedhjeve.”- tha Basha.
Sa i përket kërkesës për zgjedhje të parakohëshme, Basha tha se opozita në radhë të parë do të kërkojë të garantohet liria e votës dhe më pas zgjedhjet një orë më parë.
“Ne do të këmbëngulim që shqiptarëve t’ju garantohet vota e lirë dhe të shkojnë një orë më parë në kutitë e zgjedhjeve”- deklaroi ai. /Opinion.al
