Kryedemokrati Lulzim Basha ndodhet në Shkozet, aty ku po monitoron nga afër situatën e krijuar pas tërmetit që goditi vendin mëngjesin e së martës.
Pasi kryeministri Edi Rama e ftoi sot publikisht të ulen pa humbur kohë në tryezë për të dëgjuar idetë dhe propozimet e tyre konkrete, Basha u shpreh se s’është koha as për politike as për propagandë dhe kjo është ajo që duhet të bëjë cdo njeri tjetër.
“E gjithë energjia jonë, ajo që po bëjmë dhe do të vazhdojmë të bëjmë është të jemi afër njerëzve dhe t’i ndihmojmë sa të jetë e mundur. Jemi gjendur pranë komuniteteve, njerëzve në nevojë dhe do të vazhdojmë ta bëjmë këtë. Ky është prioriteti ynë tani. Tani nuk është koha për politikë. Njerëzit janë në nevojë ekstreme, njerëzit kanë nevojë për strehë, njerëzit kanë nevojë për ushqim, shumë kanë nevojë për vëmendje mjekësore, që nuk po e marrin, të tjerë kanë nevojë për siguri, se i kanë shpëtuar një fatkeqësie dhe duhet të bëhemi gati që të përballojmë çdo gjë tjetër, qoftë me kaq! Pra, tani s’është koha as për politikë, as për propagandë. Gjëja e vetme me të cilën po merremi ne, është të jemi afër njerëzve dhe kjo është ajo që duhet të bëjë çdokush tjetër.” u shpreh Basha./Opinion.al
