Kryetari i Partisë Demokratike Lulzim Basha ka qenë i pranishëm në një tryezë me gazetarë dhe shoqata të medias. Ai ka thënë se gazetarët janë nën trysni të fortë e madje marrin edhe kërcënime për jetën, duke iu referuar rastit të disa kohëve më parë të Klodiana Lalës.
“Janë nën trysni dhe kërcënime të vazhdueshme për shkak të detyrës, e kam fjalën për kërcënime për jetën nga krimi i organizuar që kanë marrë edhe formën e goditjen me armë si me kolegen tuaj Klodiana Lala”, ka thënë Lulzim Basha.
Ai gjithashtu është shprehur se në vitet e fundit, investigimet kryesore kanë ardhur nga mediat e huaja dhe shumë pak nga ato shqiptare. Kryedemokrati tha se mediat kryesore në vend nuk po luajnë rolin që i takon në denoncimin e shkeljeve të ligjit.
“Kanë probleme që lidhen me profesionalizmin që kanë cuar me dashje apo pa dashje në braktisjen e medias nga interesi publik, dhe vënien e saj në shërbim të interesave jo publike deri kriminale. Problemi kryesor që në shohim në raport me median është pamundësia apo paaftësia për të pasqyruar probleme të thella të shoqërisë, ekonomisë e politikës. Kjo i kthen në kronikan sipërfaqësor, në vend që të luajnë rol të rëndësishëm sic është ai i hulumtimit. Duhet të denoncojë politika që ta japë media. Na akuzojnë se jemi bërë ne si media, për të plotësuar një boshllëk të lënë prej saj. Rol më të madh kanë luajtur mediat e vogla, portalet online, se sa mediat e mëdha dhe të rëndësishme”, është shprehur në fjalën e tij Lulzim Basha./Opinion.al
