Lulzim Basha ka deklaruar ditën e sotme se kanë bërë gati 2 amendamente për të mbështetur Strukturën e Posaçme Kundër Korrupsionit dhe Krimit të Organizuar në misionin që ka marrë përsipër.
Në një konferencë me gazetarët, Basha thotë se amendamenti i parë ka të bëjë me dispozita ligjore që ndihmojnë në fuqizimin strukturor të SPAK.
Nga ana tjetër amendamenti i dytë ka të bëjë me ndryshime të Kodit të Procedurës Penale.
”Kjo e konfirmon luftën kundër korrupsionit si një prioritet kombëtar. Prioritetin tonë në raport me alternativën qeverisëse, po ashtu edhe mbështetjen tonë për SPAK-un dhe drejtësinë për sulmet që i vijnë nga të pushtetshmit e qeverisë dhe pushtetit vendor që përpiqen të kontrollojnë çdo vendim të organeve të drejtësisë. Përsëris thirrjen për të forcuar një front të përbashkët me të gjithë njerëzit e ndershëm të këtij vendi që kërkojnë drejtësi.
PD ka bërë gati dhe do të dorëzojë në Parlament amendamente për të mbështetur SPAK-un në misionin që ka marrë përsipër. 2 amendamente të propozuara kanë përfunduar pas një pune të kujdesshme të ekipit tonë juridik, i pari ka të bëjë me dispozita ligjore që ndihmojnë në fuqizimin strukturor të SPAK. I dyti ka të bëjë me ndryshime të Kodit të Procedurës Penale me qëllim mbushjen sipas standardeve evropiane të vakumit ligjor në raport me ekzekutimin e vendimeve të huaja penale, si dhe kompetencat e GJKKO-së në lidhje me njohjen e vendimeve të huaja penale.
Të dyja këto ndërhyrje që propozohen kanë për qëllim të përmirësojnë kapacitetet e SPAK dhe t’i rrisin ato me efekt të drejtpërdrejtë goditjen e korrupsionit qeveritar dhe krimit të organizuar dhe për t’i shërbyer një prioriteti mbarëkombëtar që është lufta kundër korrupsionit”, tha Basha.
