Kryetari i Partisë Demokratike, Lulzim Basha është shprehur se këtë vit Dita Ndërkombëtare e Trashëgimisë Kulturore e gjen Shqipërinë pa Teatrin Kombëtar, i cili u shemb pak muaj më parë.
Përmes një postimi në rrjetet sociale, Basha rikonfimron se PD do të angazhohet për rindërtimin e Teatrin Kombëtar siç ishte aty ku ishte.
Po ashtu, ai thekson se të gjithë ata persona që të cilët u përfshinë në prishjen e teatrit do të dalin para drejtësisë.
Reagimi
Këtë vit, Dita Ndërkombëtare e Trashëgimisë Kulturore e gjen Shqipërinë pa Teatrin Kombëtar, që u shemb nga regjimi si dëshmi e barbarisë dhe urrejtjes që kjo qeveri ushqen për vlerat dhe institucionet e kombit tonë.
Teatri Kombëtar nuk ishte thjesht një institucion i kulturës dhe një gjurmë elegante e trashëgimisë tonë. Falë rezistencës së artistëve, aktivistëve, intelektualëve dhe qytetarëve të Tiranës, ai u shndërrua në një vijë ndarëse ndërmjet regjimit dhe qytetarisë.
Rikonfirmoj angazhimin tim personal dhe të Partisë Demokratike se Teatrin Kombëtar do ta rindërtojmë siç ishte aty ku ishte dhe ata që e sulmuan dhe e shembën brutalisht do të dalin përpara drejtësisë për këtë krim të rëndë ndaj kulturës, qytetarisë dhe mënyrës tonë të jetesës./ Opinion.al
