Kryetari i Partisë Demokratike Lulzim Basha përmes një publikimi në mediat sociale, ka kërkuar që policia të garantojë të drejtën e protestuesve për të protestuar paqësisht.
Kjo thirrje e Bashës vjen në një moment, kur në fakt pas dy ditësh të dhunshme protestash, policia është duke shpërndarë edhe grumbullimet e ditës së tretë.
Basha bën thirrje për hetim transparent mbi ngjarjen, ndërsa pohon se këtë qëndrim e ka ndarë edhe në bisedat me përfaqësues të komunitetit ndërkombëtar.
“Sot kam patur disa biseda me përfaqësues të komunitetit ndërkombëtar lidhur me zhvillimet e fundit. Ndava thirrjen për një hetim transparent dhe drejtësi për vrasjen e Klodjan Rashës, si dhe zbardhjen e përpjekjeve për manipulimin e ngjarjes dhe vënien e përgjegjësve para ligjit. Dënova gjuhën e urrejtjes të përdorur nga kryeministri, si dhe brutalitetin dhe dhunën e policisë ndaj minorenëve dhe gazetarëve. Përsëris thirrjen për të ndalur brutalitetin e policisë dhe për të garantuar të drejtën e protestuesve për të protestuar të lirë dhe paqësisht”, shprehet Basha./Opinion.al
