Kryetari i Partisë Demokratike, Sali Berisha ka mbajtur fjalën pasditen e sotme në seancën plenare.
Nga foltorja e Kuvendit, Berisha u shpreh se në 4-vjeçarin e fundit parlamenti është rreshtuar kundër qytetarëve dhe kundër parimeve demokratike të një vendit të rinjë.
Sipas kryedemokratit, miratimi i ligjeve nga mazhoranca ka thelluar hendekun mes të varfërve dhe të pasurve.
Pjesë nga fjala e Sali Berishës:
Kjo është seanca e fundit e këtij parlamenti, i cili në katër vite u rreshtua kundër qytetarëve, kundër interesave të tyre, kundër parimeve demokratike të një vendi të lirë dhe do të përfundojë në histori, si parlamenti i narkodiktaturës.
Pse ju do hyni në histori si parlamenti më i zi, pas diktaturës komuniste? Sepse ju për herë të parë në historinë 34-vjeçare, votuat me dhjetëra ligje e vendime me të cilat varfëruat gjithnjë e më shumë qytetarët shqiptarë, shumëfishuat rrogat tuaja dhe të zyrtarëve dhe kur erdhi puna te pensionet ju latë një shumë qesharake, 16 milionë për 800 mijë pensionistë dhe në këtë parlament kreu juaj deklaroi se nëse rriten pensionet Shqipëria bie në humnerë.
Ju me ligjet thelluat hendekun mes të varfërve dhe të pasurve. U bëtë strumbullar i politikave të përzënies nga Shqipëria. Në 4 vite kanë ikur nga Shqipëria më shumë se çdo kohë tjetër, përfshirë vitin 1991.
Ju u bëtë mburojë e plaçkitjes më të madhe të pronave publike nga deputetët tuaj, nga kreu juaj, i buxhetit. E shoh se e fshihni fytyrën para kamerave, por pavarësisht se e fshihni fytyrën populli ju sheh. Nuk mundet që mos shohë qytetari te ju njerëzit e pashpirt, të mos jetë u ndërgjegjshëm qytetari se kryetari juaj blen vazo në oborr aq sa kushtojnë 120 mijë pensione.
