Sekretari i Përgjithshëm i Partisë Demokratike Gazment Bardhi do të drejtojë fushatën në qarkun e Elbasanit për zgjedhjet e 25 Prillit.
Ai është prezantuar zyrtarisht në këtë qark, ndërsa është shprehur se drejtuesit në këto 8 vite kanë bërë që Elbasani të kthehet në provincën ku sundon një bandë që grabit gjithçka.
“Elbasani është ndoshta shembulli më emblematik që dëshmon se çfarë ka bërë ‘rilindja’ në 8 vite. Dy botë të ndryshme që shtrihen në mënyrë paralele. Ushtruesit e pushtetit, me privilegjet e pasuritë e tyre në simbiozë të plotë me grupet kriminale në një anë. Dhe njerëzit, qytetarët dhe banorët, të harruar e braktisur, në anën tjetër. Njerëzit me pushtet kanë përfituar gjithçka në këto dy mandate. Para, influencë, territor, dhe kanë sunduar me forcë mbi pjesën tjetër. Përfytyroni se si një njeri i vetëm vendos për gjithçka, për punësimin, për tenderat, për shpërndarjen e favoreve, per ndihmen ekonomike, të gjitha këto sipas interesave personale. A mundet që një qark i tërë me rreth 450 mijë banorë të punojë për një grusht njerëzish. Përpos se padrejtësi, është edhe fyerje. Elbasani i dijes, i urtësisë, i edukimit, i kontributit madhor në histori, të shndërrohet për 8 vite në provincën ku sundon një bandë që grabit gjithçka. Me 25 prill, Elbasani, Librazhdi, Përrenjasi, Gramshi, Belshi, Cerriku, Peqini, do të çlirohen nga këta pushtues”, është shprehur Bardhi.
Gjatë prezantimit të tij si drejtues politik i qarkut, Bardhi është shprehur se kjo është për të një sfidë dhe përgjgjësi e madhe, ndërsa tha se “rilindja”, do të marrë një goditje të fortë pikërisht në këtë qytet.
“Me Partinë Demokratike, Elbasani do të fitojë vendin që i takon, do të dalë nga varfëria e do të gëzojë potencialin që e ka. Projektet e zhvillimit do të zëvendësojnë pazaret. Merita do të sjellë në krye më të mirët, më të zotët. Sundimi do të zevendësohet me llogaridhënien ndaj qytetarëve. Këtu në zemër të Shqipërisë, “rilindja”, do të marrë një goditje të fortë. Jam i bindur se qarku Elbasanit do të jetë në vijën e parë të ndryshimit”, tha Bardhi./Opinion.al
