Shqipëria është përfshirë këto ditë nga një mot me reshje të dendura të cilat kanë krijuar jo pak probleme në disa zona të vendit duke sjellë edhe përmbytje.
Partia Demokratike në një deklaratë zyrtare ka denoncuar se mbi një mijë banorë të zonës së Zall Bastarit në Tiranë kanë mbetur të bllokuar pasi ura që përdoret për kalimin e tyre është mbuluar nga uji lumit i cili është tejngopur nga shirat.
Ato akuzojnë kryebashkiakun Veliaj se ka mashtruar banorët për ndërtimin e një ure të re që sipas tyre ka nisur të ndërtohet 3 vite më parë.
Deklarata e plotë e PD
Reshjet e shiut kanë krijuar një situatë të rrezikshme në Zall Bastar. Mbi një mijë banorë janë pothuajse të izoluar, pasi e vetmja urë, në gjendje të mjeruar, është gati e mbuluar nga uji i vrullshëm i lumit.
Kjo është e vetmja urë, ku nxënësit kalojnë për të shkuar në shkollë dhe, siç tregojnë pamjet, është një rrezik i përditshëm në stinën e shirave.
Prej shumë vitesh banorët kanë protestuar, kanë kërkuar zgjidhje nga qeveria dhe bashkia për një urë të re të sigurt, por problemi i tyre nuk është zgjidhur.
3 vjet më parë, Erion Veliaj dhe Xhemal Qefaliaj inspektuan punimet e nisura për një urë të re, por në realitet nuk ka asnjë të tillë.
Disa muaj më parë, kur protestuan për urën e munguar, banorët u thanë përfaqësuesve të PD, Gent Strazimiri dhe Abi Malltezi se fondet për urën e Zall Bastarit shkuan në Surrel, për kompaninë e ish kryetarit të komunës Dajt, Kujtim Qefaliaj, njëkohësisht edhe kryetar i njësisë administrative Dajt.
Zall Bastari është pjesë e Bashkisë së Tiranës, por premtimi i Erion Veliajt se “banorët e periferisë do të trajtohen njësoj si ata në ish Bllok, rezulton një nga mashtrimet e tij të shumta. /Opinion.al
