Një grup kriminal në Haiti ka plagosur dhe vrarë të paktën 7 persona që po marshonin në një protestë të organizuar nga një drejtues i kishës.
Sulmi u filmua në kohë reale nga gazetarët në vendngjarje, dhe disa njerëz u vranë dhe të tjerë u plagosën, tha për Associated Press Marie Yolène Gilles, drejtore e grupit të të drejtave të njeriut Fondasyon Je Klere.
Qindra ithtarë, disa prej tyre të armatosur me hanxharë marshuan përmes një pjese periferike të kryeqytetit Port-au-Prince në përpjekje për të larguar anëtarët e grupit kriminal.
Këta të fundit hapën zjarr mbi ta me automatikë.
Protesta ndodhi në periferinë e Canaan që është themeluar nga të mbijetuarit e tërmetit shkatërrimtar në vitin 2010.
Bandat në Canaan janë fuqizuar që nga vrasja e presidentit Jovenel Moïse në korrik 2021 dhe vlerësohet se ato kontrollojnë deri në 80% të Port-au-Prince.
Gédéon Jean, drejtor i Qendrës së Haitit për Analizë dhe Kërkim në të Drejtat e Njeriut, i tha AP se ai gjithashtu e pa ngjarjen të shpalosej në internet dhe planifikoi t’i kërkonte Ministrisë së Drejtësisë të hetonte.
Ai e akuzoi pastorin si të papërgjegjshëm sepse ai “angazhoi një grup njerëzish dhe i vuri në një situatë si kjo”.
Famullitarët që mbanin hanxhar dhe bërtisnin “Lironi Kanaanin!” nuk mund të krahasoheshin me anëtarët e bandës të armatosur me pushkë.
“Policia duhet t’i kishte ndaluar ata të shkonin,” tha Jean. “Është jashtëzakonisht e tmerrshme për shtetin të lejojë që diçka e tillë të ndodhë.”
Nga 1 janari deri më 15 gusht, më shumë se 2,400 njerëz në Haiti u raportuan të vrarë, më shumë se 950 të rrëmbyer dhe 902 të tjerë të plagosur, sipas statistikave më të fundit të Kombeve të Bashkuara.
