Vlonjati Genis Mehillaj, i dënuar nga gjykata me 10 vite burg, arrestohet në Tiranë. Prej tre vitesh, mësohet se Mëhillaj ishte shpallur në kërkim me vendim të gjykatës. Por në përfundim të procesit hetimor dhe gjyqësor në gjykatën e Shkallës së Parë për Krime të Rënda, Mëhillaj është gjetur fajtor vetëm për një akuzë, si porositës i vrasjes së shtetasit Sokol Veizit.
Vrasje të cilën e ka kryer Julian Sinanaj, tashmë i dënuar por me cilësinë e të penduarit të disa ngjarjeve kriminale.
Për këtë vepër penale, gjykata e shpalli Mëhillajn fajtor duke dënuar me 10 vite burg. Ky vendim, është ankimuar në Gjykatën e Apelit për Krime të Rënda nga prokuroria.
Organi i akuzës ka kërkuar që Genis Mëhillaj të dënohet me burgim të përjetshëm për disa akuza; si vrasje me paramendim, akte terroriste me vendosje eksplozivi dhe vepra të tjera penale.
Kundër vendimit ka qenë avokati mbrojtës, i cili gjatë gjithë hetimit penal e gjyqësor ka pretenduar se klienti i tij, Genis Mëhillaj është i pafajshëm.
Pritet në ditët në vazhdim, që Gjykata e Apelit për Krime të Rënda të nisë shqyrtimin gjyqësor të çështjes, pas ankimit të dosjes nga prokuroria dhe avokatët.
Për këtë dosje, është dënuar edhe kushëriri i tij Andon Mëhillaj, Marjon Mitro, Ilir Karçini, Albin Mexhaj, Ndriqim Kokona dhe vrasësi Julian Sinanaj që ka rrëfyer 2 vrasje me armë dhe tre atentate me eksploziv kunderejt pagesave të ndryshme.
