Ditën e sotme kryetarja e delegacionit të Bashkimit Europian në vendin tonë Christiane Hohmann i ka dorëzuar progres raportin e komisionit Europian për Shqipërinë, zv.kryeministres Belinda Balluku.
Në fjalën e saj, Balluku u shpreh se raporti vjetor është një punë e jashtëzakonshme e BE-së dhe e Shqipërisë, ndaj dhe sipas saj është pikënisja për të përmbushur detyrimet që rrjedhin nga ky raport.
Ndër të tjera, zv.kryeministrja e bindur tha se ritmi i përparimit të Shqipërisë do të jetë më i shpejtë se i vendeve të rajonit.
“Dje KE prezantoi si cdo vit paketën e re të zgjerimit dhe raportoin vjetor 2022 për Shqipërinë. Raporti vjetor është një punë e jashtëzakonshme e BE dhe e Shqipërisë. Ndaj dhe dorëzimi i tij nuk është moment ceremonial, por pikënisja për të përmbushur detyrimet që rrjedhin nga ky raport. Aspirata e Shqipërisë për tu bërë pjesë e BE është e pamohueshme. Ne nuk kemi pasur iluzione të gabuara për të arritur qëllimin final, por kemi qenë dhe jemi të vendosur për të qenë në lartësinë e këtyre sprovave. Nuk ishte një rrugë e lehtë dhe as nuk do të jetë e lehtë. Ne mund të mbështetemi tek miqtë dhe partnerët tanë. Kam bindjen se ritmi i përparimit të Shqipërisë do të jetë më i shpejtë se i vendeve të rajonit. Progres raporti evidenton arritjet në luftën kundër korrupsionit dhe krimit të organizuar dhe mbrojtjen e vlerave europiane. Kemi ruajtur ritmin gjatë viteve të vonesave dhe pasigurive. Nuk ishte rrugë e lehtë dhe nuk do të jetë e lehtë, por do të mbështetmi te miqtë tanë në unitetin që qëndron pas objektivave”, tha Balluku./Opinion.al
