Presidenti i Serbisë, Aleksandar Vuçiç i është përgjigjur pyetjes nëse pas nismës së Ballkanit të Hapur qëndron ministri i Jashtëm rus, Sergei Lavrov.
Vuçiç u shpreh se ideja dhe miratimi i nismës së Ballkanit të Hapur ka qenë e tija, Ramës dhe ish-kryeministrit maqedonas, Zoran Zaev.
Ai tha se nuk ka qenë asnjë ministër i Jashtëm në këtë nismë edhe pse u shpreh qartë për miqësinë e marrëdhëniet e afërta që ka me Rusinë.
“Isha prezent kur e miratuam idenë e Ballkanit të Hapur, nuk ka qenë asnjë ministër i Jashtëm. Nuk kam turp për politikën e Serbisë dhe nuk turpërohem për marrëdhëniet e mira që kemi me Rusinë. Askush tjetër përveç nesh nuk e kishte idenë për ngritjen e Ballkanit të Hapur. Kjo ishte ideja e njerëzve që dëshironin të bashkëpunojnë. Të ketë më shumë qytetarë serbë të vijën në bregdetin shqiptar. Të mendojmë si të bëjmë diçka të përbashkët. Ideja e Ballkanit të Hapur është e imja, Edi Ramës dhe e Zoran Zaevit. Askush tjetër nuk ka marrë pjesë në këtë ide. Ne e dimë se me kë kemi biseduar, kush na ka ndihmuar. Por ideja është e jona”,-tha Vuçiç./Opinion.al
