Seanca e sotme parlamentare duhet të zhvillohej në kuadër të problematikave që deputetët kishin evidentuar pas një jave në terren me zgjedhësit, por siç pritej, jehonë në sallë kanë bërë debatet për problemet e brendshme të Kuvendit, reforma zgjedhore dhe mos çelja e negociatave me BE-në.
Në fjalën e tij, kryetari i grupit parlamentar socialist Taulant Balla tha se brenda këtij viti duhet mbyllur reforma zgjedhore dhe për këtë ai i bëri thirrje opozitës.
“I bej thirrje deputeteve të opozitës se është në detyrën tonë historike që ne të vijojmë punën për realizimin e detyrave të shtëpisë se hapeshin apo jo negociatat me 18 tetor ne kemi padyshim detyra shpie që duhet ti realizojmë dhe mendoj që instrumenti i vene në dispozicion nga Bundestagu është udhërrëfyesi ynë më i mirë, duhet ta përmbyllim kodin zgjedhor deri në Krishtlindje se padyshim që deri në pranverën e ardhshme edhe ata që janë kundër vijimit të procesit të zgjerimit do kenë ndryshuar mendje se gabimi strategjik duhet korrigjuar menjëherë” tha Balla.
Ndër të tjera ai përshëndeti propozimet e komisionit për ndryshime në ligjin e financimeve politike duke thënë se raste si ai për të cilin po hetohet kreu i PD duhen ndaluar.
“E përshëndes përpjekjen e komisionit për të bërë edhe ndryshimet e domosdoshme në ligjin për financimet politike, se kemi pasur një rast kur kreu i PD është tani ne hetim, duhet ti presim rrugën çdo lloj financimi të dyshimte”, tha Balla.
Kreu i grupit parlamentar socialist foli edhe për seancën e Parlamentit Europian ku u miratua rezoluta në favor të Shqipërisë për çeljen e negociatave. Ai shkoi deri aty sat ha se shumë deputetë kanë qenë me flamuj të Shqipërisë dhe Maqedonisë në duar në shenjë proteste për vendimin e 18 tetorit.
“Kam pasur mundësinë të isha prezent në Parlamentin Europian javën e kaluar teksa miratohej rezoluta. Jam ndjerë krenar që në sallat e parlamentit europian deputetë socialist të mbanin në duar flamuj të Shqipërisë dhe Maqedonisë në shenjë proteste” deklaroi Balla. /Opinion.al
