Për socialistët, progres raporti i Komisionit Europian edhe një herë, tregoi se qeveria është në rrugën e duhur. Numri dy i PS-së, Taulant Balla nga Kuvendi tha se “kjo mbështetje është pikënisja ku mbështetet puna e qeverisë sonë për të ndërmarrë reformat”.
“Është fakt se vendimi i cili ishte rekomanduar që vitin e kaluar u shty akoma më tej për arsye politike. Shqipëria mund të influencojë por nuk mund të jetë vendim marrëse. Progres raporti i bazuar në fakte, ndonëse nuk i hapi negociatat vitin e kaluar, qeveria jonë vijoi punën. Progres raporti i publikuar dje, është raporti më i mirë që ka marrë vendi ynë. Shqipëria do i hapë negociatat brenda vitit 2019. Viti 2019 do mbahet mend për hapjen e bisedimeve dhe përpjekjet e opozitës për të minuar rrugën evropiane”, deklaroi Balla.
Sipas tij në progres raport theksohet se reforma në drejtësi është unike.
“Çështjet e brendshme nuk duhet të krijojnë një barrierë. Në raport evidentohet se lufta kundër korrupsionit përfshin shkarkimin nga detyra edhe të gjyqtarëve që nuk respektonin asnjë cak. Nuk mund ta mbanim gjykatën kushtetuese me shejtanin brenda. Brenda këtij sesioni parlamentar ne fund te korrikut, vendi do ketë Gjykatën Kushtetuese”.
Por ai që ishte me këmbë në tokë dhe që e kishte lexuar më së miri progras raportin ishte ish ministri i Jashtëm, Ditmir Bushati.
“Kemi krijuar për vite kulturën e poshtërimit ndaj kundërshtarit. Qeveria në këtë proces ka barrën kryesore dhe duhet të bëjë detyrën. Merita për këtë progres raport është vetëm e shqiptarëve. Është koha për një mirëkuptim më të madh politik. Pjesa më e madhe sot kërkon dialog dhe jo konfrontimin”, deklaroi Bushati./ Opinion.al
