Pas dënimit me një vit burg për çështjen “Babalja”, ish-deputeti Ervin Salianji ka kundërshtuar në rrugë ligjore dënimin e dhënë nga Gjykata e Shkallës së Parë Tiranë.
Mësohet se, Ledio Braho, avokati i Salianjit ka firmosur ankimin e këtij vendimi duke e depozituar atë në Gjykatën e Apelit në Tiranë.
Ky lajm është konfirmuar dhe nga avokati Braho, i cili ka thënë se bëhet fjalë për një ankim formal, me qëllim kapjen e afateve kohore të ankimimit.
“Në ditët në vijim do të depozitojmë ankimin e plotë dhe të argumentuar përmes të cilit do t’i kërkojmë Apelit të ndryshojë vendimin e Shkallës së Parë dhe të deklarojë të pafajshëm ish-deputetin Ervin Salianji”, tha avokati Braho.
Përveç pretendimeve për mungesë provash, vend të konsiderueshëm në ankim pritet të zënë edhe argumentet e ish-deputetit për falsifikim faktesh nga ana e gjyqtarit Artan Gjermeni, në vendimin e arsyetuar të gjykatës.
Ankim kundër vendimit të shpallur në 18 dhjetor 2019 ka bërë edhe gazetari Jetmir Olldashi, i cili u dënua 100 orë punë në interes publik, si edhe i fajësuari si aktruesi i zërit të vëllait të ish-ministrit të Brendshëm në audio-përgjim, Fredi Alizoti, i dënuar me dy vite burg./ Opinion.al
