Në sportin e bejzbollit duhen reflekse të shpejta, tashmë jo vetëm për lojtarët në fushë për edhe për tifozët. Kështu ka ndodhur këtë fundjavë në Florida gjatë një ndeshje mes ekipeve të Pittsburgh Pirates e Atlanta Braves. Një lojtari në fushë i ikën shkopi me të cilin po godiste topin dhe fluturon në tribunë. “Viktimë” do të ishte një fëmijë 10-vjeçar, që në ato momente po luante me celularin e tij.
Por, për fat të mirë, babai i tij që ndodhej në sediljen pranë bëri heroin. Babai zgjati dorën dhe pengoi shkopin të godasë djalin e tij në fytyrë, pamje të cilat janë kapur edhe nga një fotograf, Christopher Horner. Në fund të atij incidenti, që për fat nuk shkaktoi viktima, djali e mbajti shkopin e bejzbollit si kujtim.
