Kryetari i Partisë Demokratike, Lulzim Basha ka postuar një video-mesazh në Facebook nëpërmjet të cilit tregon se mos çelja e negociatave ka ardhur si pasojë e qeverisë së Edi Ramës.
Në video-mesazhin e postuar nga kreu i demokratëve, ai i referohet artikullit të djeshëm të gazetës gjermane Der Spiegel ku thuhet se mos çelja e negociatave me Shqipërinë ishte një vendim i kuptueshëm nga ana e Këshillit Europian.
Der Spiegel shkruante gjithashtu se reformat në vend kanë ngecur dhe ka dyshime se partia në pushtet ka lidhje me krimin e organizuar. Kryeministri Rama aty përmendet si një njeri autoritar në qeverisje dhe që bie në sy për stilin e tij të veshjes.
“Të gjithë shqiptarët e dinë të vërtetën që revista më e madhe e Europës, Der Spiegel e shkruan të zezë mbi të bardhë: Europa nuk refuzoi Shqipërinë, por refuzoi Ramën, sepse ai është një autokrat që rri në pushtet me ndihmën e krimit. Shqipëria e meriton hapjen e negociatave. Shqiptarët meritojnë më të mirën. Një njeri e pengon këtë rrugë. Europa e refuzoi, tani është koha ta refuzojnë shqiptarët” shkruan Basha. /Opinion.al
